Gumshem Myen hpyen dap hpe KIA hte PDF ni sa htim gap gasat
Mungmyit Sinli Ga, (Kachin Sub-state), KIA Masat (4) Dap Ba, Masat (34) Dap Dung ginra, Baw Dwi nhprang nhkun makau kaw dap jung shara jahkrat nga ai, gumshem Myen hpyen hpe, August shata 25 ya jahpawt 7:00am aten daram hta KIA hte PDF pawng hpawm hpyen hpung ni sa htim gap ai kawn gasat poi byin ai lam chye lu ai.
Gasat poi byin ai hpang, Nam Du, gumshem Myen hpyen dap byuha kawng kaw nna mung, laknak kaba hte gap bun ai lam chye lu ai.
August shata 19 ya shani hta mung, KIA Masat (4) Dap Ba, Masat (34) Dap Dung ginra, Mandung kaw dap jung shara jahkrat nga ai gumshem Myen hpyen Hk.L.Y (130) dap hpe KIA ni sa htim gap gasat ai lam nga ai re.
Mungmyit sinli ga, ginra ni hta laknak lang rawt malan wuhpung ni hte gumshem Myen hpyen dap ni jahkring hkring gasat gala majan byin nga ai majaw, ya aten Muse Muklum hta gumshem Myen hpyen dap a lagaw lata tai ai Pyi Tu Tsit ni kaw nna, lai wa lai sa mungmasha ni hpe san jep ai lam galaw nga ai hpe ginra masha ni tsun dan ai kaw na chye lu ai.
