Gumshem Myen hpyen dap hpe KIA ni gasat zing madu la lu
KIA Masat (3) Dap Ba, Masat (27) Dap Dung kata na hpyen hpung ni Manwin Gawkngu Yang kaw dap jung nga ai, gumshem Myen hpyen dap hpe gasat zing madu la lu sai lam chye lu ai.
January shata 19 ya jahpawt hkying 8:00am aten kaw na, Manwin Gawkngu Yang gumshem Myen hpyen dap hpe htim gasat ai hta shana maga hkying 1:00pm aten daram hta gasat zing madu la lu sai rai nna, Myen bawng masha marai (27) hpe mung lu rim la ai lam, lit nga ai salang langai tsun ai.
Masat (27, 12, 1) Dap Dung kata na pawng hpawm hpyen hpung ni mung, Ban Hkung Yang gumshem Myen hpyen dap hpe January shata 19 ya jahpawt hkying 8:00am aten kaw na htim gasat ai hta hkying 10:15am aten laman hta zep zi padang dip la lu sai lam chye lu ai.
Matut nna KIA Masat (9) ginra hta January shata 18 ya shani kaw na, Hpakant Gwi Hka gumshem Myen hpyen dap hte KIA ni gasat gala majan byin nga ai hta gumshem Myen hpyen dap ni nbungli hte bawm wa jahkrat bun nga ai lam matut chye lu ai.
