Gumshem Myen hpyen dap hpe KIA ni hkap shingla gasat
Mungmyit Sinli Ga (Kachin Sub-State), KIA Masat (4) Dap Ba, Masat (8) Dap Dung ginra, Yung Ngaw mare makau kaw August shata 17 ya shana hkying 3:12pm aten hta Nam Gut maga na lagaw lam rawt wa ai Tatma (99) dap na gumshem Myen hpyen ni hpe KIA ni hkap shingla gasat dat ai lam chye lu ai.
August shata 17 ya shani hta sha, Mung Dat kaw nna Mung Sing maga de modo 1 hte rawt wa ai gumshem Myen hpyen Hk.M.Y (324) dap na hpyen n-gun (30) daram hpe KIA ni Gyu Mung Hkyet kaw bawm 5 lang hkap gap gasat dat ai hpang, gumshem Myen hpyen ni makau grupyin shara ni de, sinat kaji hte bai nhtang gap bun ai lam, shawng lam shiga lawk kaw na chye lu ai.
Namhpakka kaw dap jung shara jahkrat nga ai gumshem Myen hpyen dap Hk.L.Y (123) dap ni mung, August shata 17 ya shani hkying 1:20pm aten daram kaw nna, Mung Yu maga hte Yung Ngaw Post dingsa maga de, sinnat kaji kaba gap shadam bun ai lam mung nga ai re.
KIA Masat (3) Dap Ba, Masat (12) Dap Dung ginra hta mung, August shata 17 ya shani kaw, gumshem Myen hpyen dap Hk.L.Y (121, 77) hte Hk.M.Y (319) dap na pawng hpawm hpyen n-gun (80) hpung ni gaw, Zin Bung mare na mungshawa ni a, dum nta htinggaw (27) hpe wan nat jahten kau ya ai lam, ginra masha ni kaw na chye lu ai.
