Gumshem Myen hpyen dap hpe KIA ni sa htim gap gasat zing la
KIA Masat (9) Dap Ba, Masat (44) Dap Dung ginra, Sa Maw, Singgat Yang (ပြွန်သုံးလုံး) kaw dap jung shara jahkrat nga ai gumshem Myen hpen dap Hk.M.Y (383) hte (384) dap ni hpe KIA Dap Dung (44) hpyen hpung ni December shata (24) ya jahpawt hkying 2:50am aten hta, sa htim gap gasat zing la lu sai lam chye lu ai.
KIA hpyen hpung ni gaw, jahpawt hkying 2:50am aten kaw nna hkying 3:30am aten laman, gumshem Myen hpyen dap (2) hpe sa htim gap gasat ai hta, Myen hpyen dap kata na hpyen laknak arung arai Modo (2) daram zing madu la lu ai lam, shawng lam shisawk ni kaw na chye lu ai.
Gumshem Myen hpyen dap ni gaw, hpyen N-bungli langai hte jahpawt hkying 5:00am aten hta, gasat gala majan byin ai de 5 lang wa gap gayin kau da ai rai nna, lahkawng magaai gasat gala majan byin majaw, mare de sinat laknak si langai wa hkrat kapaw ai raitim, mung mare masha ni hpa nra ai lam, buga masha ni tsun shana wa ai kaw na chye lu ai.
December shata (23) ya shana maga hkying 4:00pm aten daram hta mung, KIA Masat (9) Dap Ba ginra hta hpyen shamu shamawt hkawm nga ai Gumshem Myen hpyen hpung ni hpe Gwi Hka, Jam Ga kawng kadawng kaw KIA Dap Dung (6) hpyen hpung ni hkap gap gasat ai kawn gasat gala majan byin ai lam chye lu ai.
