Gumshem Myen Hpyen Dap hpe MNDAA hpyen hpung ni sa htim gap
Mungmyit Sinli Ga (Kachin Sub-state), Bang Sai makau Nam Hu mare ntsa kaw July shata 21 ya shani hkying 11:00am aten hta Kokang MNDAA hpyen hpung ni hte Gumshem Myen Hpyen Dap, Hk.L.Y (79), HK.M.Y (315) dap ni gasat gala majan byin ai lam chye lu ai.
“Myen hpyen hpung ni nga taw ai kaw Kokang ni sa htim gap ai. Gasat gala gaw daini hkying 11:00am kaw nna hkying 11:20am aten hta numdaw kalang, 12:00pm aten kaw nna hkying 2:00pm aten du hkra numdaw 2 lang gap hkat ai” nga nna shawng lam na lit nga ai salang langai tsun ai.
Bang Sai mare kaw dap jung ai Hk.L.Y (79) dap ni mung, gasat gala majan byin ai shara de laknak kaba gap garum ya ai re lam, salang wa matut tsun ai.
Kokang ni hte Gumshem Myen hpyen hpung ni gasat gala majan byin ai hpang, Gumshem Myen hpyen hpung ni gaw, Hpai Kawng mare na mare salang Lahpai Zau Nu hte Salang Lading yan hpe lam madun woi mat ai raitim, ya aten Hpai Kawng mare kaw bai du sai lam na chye lu ai.
Lai wa sai July shata 18 hte 19 ya shani hta mung, KIA Masat (6) Dap Ba, Masat (36) Dap Dung ginra, Man Jak Pa kaw KIA hte Gumshem Myen hpyen hpung ni gasat gala majan ai re. Gumshem Myen Hpyen Dap ni KIA ni nga ai shara de htu shadut lung wa ai rai yang gasat gala majan matut byin wa mai ai lam, shawng lam na lit nga ai salang ni tsun ai kaw na chye lu ai.
