Gumshem Myen hpyen dap hte KIA ni gasat gala majan byin
KIA Masat (5) Da Ba, Masat (3) Dap Dung ginra hta June shata 26 ya jahpawt hkying 9:00am aten, Waingmaw Kampaiti lam Lang Na Hka Rum hte Nwan Yang lapran kaw, gumshem Myen hpyen dap hte KIA hpyen hpung ni gasat gala majan byin ai lam chye lu ai.
Gasat gala majan byin ai hta gumshem Myen hpyen dap ni gaw, hpyen gasat nbungli hte mung wa gap gasat ai lam chye lu ai. Ndai mabyin hte seng nna matut sagawn nga dingyang re.
June shata 25 ya shani hta mung, Nwan Kawng kaw du nga ai gumshem Myen hpyen dap Hk.M.Y (389) hte Shwi Min P.T.Ts pawng hpawm hpyen hpung ni gaw, Lagat Kawng, Law Pum lam Machying hte Lang Na Hka Rum shara 3 hta sinat kaba 7 lang gap bun ai lam, shawng lam shiga lawk kaw na chye lu ai.
Lai wa sai June shata 23 ya shani hta mung, KIA Masat (3) Dap Ba, Masat (12) Dap Dung ginra hta Si Bing mare maga na rawt wa ai gumshem Myen hpyen dap Hk.L.Y (78,223, 276) hte Hk.M.Y (348) dap na pawng hpawm hpyen n-gun (200) jan hpung ni gaw, KIA hpyen hpung ni nga ai Nbungli Pa makau de htu shani lung wa ai hpe KIA hpyen hpung ni hkap shingla gasat ai kawn gasat poi byin ai lam chye lu ai.
KIA Masat (2) Dap Ba, Masat (14) Dap Dung ginra hta mung, June shata 24 ya shani Myitkyina gumshem Myen hpyen dap (M.P.Hk.) ni gaw, KIA hpyen hpung ni nga ai Wa Hka Maw maga de Jet Fighter 2 hte bawm 5 lang wa jahkrat bun ai lam, ginra shisawk ni kaw na chye lu ai. Dai ginra hta gaw gasat gala majan byin ai lam nnga ai hpe mung matut chye lu ai.
Matut nna Wa Ra Zup mare, Min Zin Thant (P.T.Ts) ningbaw a nta ntsa kawng kaw nna mung, KIA hpung ni shara la nga ai Wa Hka Maw maga de laknak kaba (10) lang gap bun ai majaw, KIA hpung ni mung sinat kaba hte bai nhtang gap bun ai lam chye lu ai.
