Gumshem Myen hpyen dap hte KIA ni gasat gala majan laja lana matut byin
Myitkyina kaw nna Nam San Yang hpyen man maga de hpyen n gun jat sa wa ai, July shata 12 ya jahpawt hkying 10:00am aten daram hta Ja Pu mare makau kaw, KIA Masat (1) Dap Nawng Daju, Masat (254) Dap Dung ginra hta gumshem Myen hpyen hpung ni hpe KIA hpyen hpung ni hkap shingla gasat ai lam chye lu ai.
Hkap shingla gasat poi byin ai hta gumshem Myen hpyen maga si hkala nga ai raitim, marai gade re hpe tup hkrak nchye lu shi ai lam, shawng lam shiga lawk kaw na chye lu ai.
KIA Masat (2) Dap Nawng Daju ginra rai nga ai Madi Yang makau kaw, July shata 12 ya shani hta gumshem Myen hpyen dap hte gasat gala majan byin ai hpang, shana daw hta gaw, lahkawng maga laknak kaba hte bai nhtang gap gasat hkat ai lam chye lu ai.
Dai ni July shata 12 ya shani hta sha, KIA Masat (9) Da Ba, Masat (44) Dap Dung ginra, Kamaing hte Lawa lam numshe kaw nga ai gumshem Myen hpyen ni hpe, dai hpawt hkying 10:00am jan aten daram hta KIA Masat (44) dap na hpyen hpung ni sa gap gasat ai lam chye lu ai.
Gasat poi hta gumshem Myen hpyen maga si hkala nga ai majaw, Kamai Byuha Kawng hte Lainawng hka makau kaw nga ai gumshem Myen hpyen dap ni sinat kaji kaba hte hkrup mara gap bun ai lam, ginra masha ni tsun ai kaw na chye lu ai.
