Gumshem Myen hpyen dap hte KIA ni gasat gala majan matut byin
Mungmyit Sinli Ga (Kachin Substate) KIA Masat (6) Dap Ba, Masat (9) Dap Dung ginra, Baknoi Bum kaw August shata praw 1 ya shana hkying 8:00pm aten hta gumshem Myen hpyen ni hte KIA ni gasat gala majan byin ai lam chye lu ai.
KIA hpyen hpung ni shara la nga ai Baknoi Bum de gumshem Myen hpyen ni htu shadut lung wa ai majaw, hkying 8:00pm aten kaw na hkying 8:30pm na yi chyen mi daram gasat hkat ai lam byin ai, nga nna shawng lam na lit nga ai salang wa tsun dan ai re.
Gasat poi zim ai hpang Namhpakka kaw dap jung ai, gumshem Myen hpyen dap ni kaw nna, majan byin ai shara de laknak kaba hte hkying 10:00pm aten daram du hkra gap bun ai lam chye lu ai.
Dai ni August shata praw 2 ya jahpawt hkying 8:20am aten hta mung, KIA Masat (5) Dap Ba, Masat (3) Dap Dung ginra, Bum Tawng hte Hka Rum lapran na Nwan Yang kaw shara jahkrat nga ai gumshem Myen hpyen dap hte Pyi Tu Tsit pawng hpawm hpyen hpung ni nga ai shara hpe KIA hpyen hpung ni sa htim gap gasat ai lam chye lu ai.
Lai wa sai July shata 28 ya jahpawt manap aten hta mung, Wuyan mare kaw dap jung shara jahkrat nga ai Pyi Tu Tsit shara hpe KIA ni sa htim gap gasat ai lam nga sai re. Dai hpang Pyi Tu Tsit ni dai shara kaw bai nga nhtawm, lai wa sai la mungshawa ni hpe laja lana sawk jep ai lam ni naw galaw nga ai lam chye lu ai.
