Gumshem Myen hpyen dap hte KIA ni gasat gala majan matut byin

KIA Masat (5) Dap Ba, Masat (19) Dap Dung ginra hta December shata 18 ya jahpawt hkying 7:47am aten daram, Hka Ya Bum de malu masha wa sa ai, gumshem Myen hpyen hpung ni hte KIA ni gasat gala majan matut byin ai lam chye lu ai.

Hka Ya Bum de malu masha, laknak arung arai wa sa da nna bai nhtang yu wa ai, modo hpung ni hte shimlam la ya ai gumshem Myen hpyen hpung ni hpe KIA ni Ding Ga mare makau hkauna pa kaw, hkap gap gasat dat ai re lam, lit nga ai salang langai tsun ai.

Gumshem Myen dap Hk.M.Y (301) dap kata na hpyen n-gun (60) daram gaw ya ten Na Lung Mare kaw du nga nna, mare mungshawa ni hpe hkan jep hkawm nga ai rai nna, ndai gumshem Myen hpyen hpung ni gaw, Ginjaw Ginra de hpyen n-gun jat nga ai re lam chye lu ai.

Shwe Nyawng Pin mare makau de mung KIA, pawng hpawm hpung ni ginra jasan hkawm nga ai ten, gumshem Myen hpyen dap Hk.M.Y (321) dap ni machyu pala htaw modo kaji (2) hte pru wa ai hpe KIA ni hkap gap gasat dat ai majaw, gasat gala majan byin ai lam, matut chye lu ai.