Gumshem Myen hpyen dap hte KIA ni gasat gala majan matut manoi byin
KIA Masat (5) Dap Ba, Masat (19) Dap Dung ginra hta September shata praw 7 ya shani hkying 10:40am aten laman, gumshem Myen hpyen dap a arung arai htaw modo 7 hpe KIA ni hkap shingla gasat ai lam chye lu ai.
Gumshem Myen hpyen dap hpyen n-gun (100) daram hte arung arai htaw modo 7 hpe KIA ni Ting Hpara hte Lung Ja Yang mare lapran kaw, bawm hte hkap adem bun dat ai lam, shawng lam na lit nga ai salang ni kaw na chye lu ai.
Ginjaw ginra, Madi Yang hpyen man maga de mung, September shata praw 7 ya shani hta sha, Mali Yang kaw nga ai gumshem Myen Balik dap, Mali Yang hte Ja Pu mare lapran kaw KIA ni laknak kaba gap dat ai majaw, gumshem Myen hpyen ni mung, sinat kaji kaba bai nhtang gap bun ai lam chye lu ai.
Dai hpang, Kawlin hpyen dap kaw nna Hk.M.Y (111, 120) dap na pawng hpawm hpyen n-gun (70) daram hpung ni, KIA ni hkap nga ai Mawlu, Nyawng Pin Tar mare hte Si Pin mare Sinpraw maga hkau na pa nam shalawng maga de gale pru wa ai hta gasat poi byin ai re.
September shata praw 6 ya shani hta mung, Mungmyit Sinli Ga (Kachin Sub-Stat), KIA Masat (4) Dap Ba, Masat (8) Dap Dung ginra, Namhkrai hka mahkrai kaw nga ai gumshem Myen hpyen dap ni hpe KIA ni sinat kaba ni hte sa gap dat ai majaw, gumshem Myen hpyen dap ni mung laknak kaba ni hte bai nhtang gap bun ai lam chye lu ai.
