Gumshem Myen hpyen dap hte KIA pawng hpawm hpyen hpung ni gasat gala majan laja lana matut byin nga
Sinpraw Ginwang Ginjaw, KIA Masat (3) Dap Ba ginra, Manje Muklum makau grup yin shara hta gumshem Myen hpyen dap hte KIA pawng hpawm hpyen hpung ni, May shata 31 ya shani du hkra gasat gala majan matut laja nga ai lam chye lu ai.
Gasat gala majan laja nga ai Manje hpyen man de, gumshem Myen hpyen dap ni gaw, Jet Fighter, Y-8, Y-12 hte Helicopter nbungli kaw nna, nhkring nsa ngu na daram bawm jahkrat bun ai sha n-ga, Manmaw kaw nna mung, laknak kaba rocket ni hte ding yang gap bun nga ai lam, lit nga ai salang ni tsun ai re.
Manmaw Manje Muklum makau kaw dap jung shara jahkrat nga ai Hk.M.Y (319), Hk.M.Y (601) Amyawk dap hte Nmawk Hk.M.Y (437) dap ni hpe May shata praw 7 ya shani kaw nna, KIA pawng hpawm hpyen hpung ni htim gasat hpang ai gaw dai ni hkra re.
Ya aten Nmawk, Manje hpyen man hte Waimaw hpyen man maga gumshem Myen hpyen hte KIA pawng hpawm hpyen hpung ni hpyen masa shaja hkat nga ding yang re. Myitkyina gumshem Myen hpyen M.P.Hk kaw nna mung, Shwe Nyang Pin grup gra de laknak kaba hte rocket ni hkrup maga gap shadam bun ai majaw, mungshawa ni si hkala hkrum ai sha n-ga, dum nta hten za mat ai du sat yam nga sisum mat ai lam byin nga ai re.
Dai ni May shata 31 ya shana maga hkying 2:00pm aten daram hta mung, gumshem Myen hpyen dap ni gap shadam dat ai laknak kaba si gaw, Lamyang mare Hkanan Buga a Hpung up sara Rev. Kareng Tang Gun hte saranum Hpakawn Roi Nau yan nu wa ni a dum nta kaw wa hkrat kapaw ai majaw, dum nta wan hkru hten za mat ai lam, ginra shiga lawk kaw na mu chye lu ai.
