Gumshem Myen hpyen dap hte KIA pawng hpawm hpyen hpung ni gasat gala majan matut byin
KIA Masat (1) Dap Ba, Masat (7) Dap Dung ginra hta May shata 18 ya shana maga hkying 2:40pm aten, gumshem Myen hpyen dap hte KIA, PDF pawng hpawm hpyen hpung ni Pat Hka kaw gasat poi byin ai lam chye lu ai.
Gumshem Myen hpyen dap ni gaw KIA, PDF pawng hpawm hpyen hpung ni shara la nga ai Pat Hka mayan de shamu shamawt chyinglau shang wa ai majaw, gasat gala majan byin ai re.
KIA Masat (3) Dap Ba, Masat (12) Dap Dung ginra hta mung, KIA ni ginra gawan hkawm ai ten, gumshem Myen hpyen dap ni, Mabing hte Hku Ta mare maga de, sinat kaba 60mm (7) lang, 81mm (4) lang hte jak sinat ni hkrup mara gap bun ai lam, shawng lam shiga lawk kaw na chye lu ai.
KIA Masat (5) Dap Ba, Masat (3) Dap Dung ginra, Bum Tawng kaw nga ai gumshem Myen hpyen dap ni Num Li hka maga de, May shata 18 ya shani ka-ang hkying 12:20pm aten hta sinat kaba (3) lang gap bun ai lam chye lu ai.
