Gumshem Myen hpyen dap hte Pyi Tu Tsit pawng hpyen hpung ni hpe KIA ni sa htim gap gasat
KIA Masat (5) Dap Ba, Masat (3) Dap Dung ginra hta shamu shamawt hkawm ai, gumshem Myen hpyen dap hte Pyi Tu Tsit pawng hpawm hpyen hpung ni hpe, June shata 22 ya jahpawt hkying 10:15am aten hta KIA ni sa htim gap gasat ai lam chye lu ai.
Gumshem Myen hpyen dap Hk.M.Y (389) dap hte Shwe Min Pyi Tu Tsit pawng hpawm hpyen n gun (50) daram gaw, KIA ni nga ai Law Pum Bum Tawng maga de shamu shamawt chyinglau shang wa ai majaw, KIA ni sa htim gap gasat ai re lam, shawng lam shisawk ni kaw na chye lu ai.
June shata 22 ya shani hta KIA Masat (9) Dap Ba, Masat (44) Dap Dung ginra, Ka-Maing Byuha Kawng kaw na rawt wa ai, gumshem Myen hpyen hpung ni Kawng Ra Mare laika sharin jawng hta du nga ai ten, KIA ni bawm hte hkap gap gasat ai lam chye lu ai.
KIA Masat (3) Dap Ba, Masat (12) Dap Dung ginra hta mung, gumshem Myen hpyen ni hpyen n gun matut jat nga ai re majaw, hpyen masa shaja hkat nga ding yang re lam, ginra shi shawk ni shana wa ai re.
