Gumshem Myen hpyen dap hte SNA ni mungshawa ni a nta hpe wan nat jahten
KIA Masat (9) Dap Ba, Masat (26) Dap Dung ginra, Sezin mare kaw gumshem Myen hpyen dap hte Sam Hkyeng, Shan National Army (SNA) dap ni, August shata praw 10 ya jahpawt manap hkying 4:00am aten hta Sezin mare mungshawa ni a nta htinggaw 400 daram hpe wan nat jahten kau ai lam chye lu ai.
Mani hpawt hkying 5:00am aten hta Sezin mare hpunggyi jawng kaw na pru wa ai,
ဦးဖိုးပိန္ asak 45 ning hte ေဒၚမႏိုင္ asak 40 ning yan hpe mara kata gumshem Myen hpyen ni gap sat kau ai, dai hpang hkying 10:10am aten hta mung, ဦးသိန္ေဇာ္ asak 40 ning, ဦးေက်ာ္ရွိ asak 42 ning, ေဒၚစန္းစန္းေအး asak 45 ning hte mying n chye ai marai 3 yawng marai 6 hpe gap sat kau ai lam, ginra shi sawk ni kaw na chye lu ai.
August shata praw 9 ya jahpawt hkying 9:50am aten hta Sezin mare kaw gumshem Myen hpyen dap ni Jet nbungli hte bawm wa jahkrat bun ai majaw, mungmasha ေဒၚေဆြ asak 48 ning hkala hkrum nhtawm, kasha ေမာင္သီပာ asak 15 ning si sum mat ai lam chye lu ai.
KIA Masat (26) Dap Dung ginra de, gumshem Myen hpyen dap hte Sam Hkyeng SNA pawng hpawm hpyen hpung ni shamu shamawt shang wa ai majaw, July shata kaw nna, Sezin mare grup yin shara ni hta gasat gala majan chyahkring hkring byin nga ai re.
