Gumshem Myen Hpyen Dap kaw nna KIA ni nga ai shara shagu de Jet Nbungli, laknak kaba ni hte matut manoi gap bun
Gumshem Myen Hpyen Dap ni kaw nna KIA ni nga ai shara shagu de Jet Nbungli, laknak kaba ni hte hkrup mara gap bun ai lam, shawng lam shisawk ni kaw na chye lu ai.
March shata 29 ya shana maga hkying 4:20pm aten hta KIA Masat (2) Dap Ba, Masat (11) Dap Dung ginra, Masat (14) Dap Dung Head Quarter ni hpe Myitkyina kawn rawt wa ai Myen Hpyen Dap Jet Nbungli (2) hte bawm wa jahkrat, gap kau da ai.
Shana maga hkying 5:55pm aten daram hta, KIA Masat (11) Dap Dung Head Quarter dingsa Sam Ngam Bum hte Head Quarter ningnan Madang Tu Bum ni hta mung, wa gap bun kau da nna, bai nhtang yu mat wa ai lam chye lu ai.
Shani hkying 11:45am aten hta sha, KIA Masat (15) Dap Dung ginra, Sin Lum Bum kaw shara jahkrat nga ai Myen Hpyen Dap ni KIA Masat (21) hpyen man maga 120mm (2) lang jahte tam gap bun ai lam chye lu ai.
Laiwa sai March shata 28 ya shana hkying 8:25-10:35pm aten laman hta mung, KIA Masat (15) Dap Dung ginra, Yaw Yung Bum kaw shara jahkrat nga ai Myen Hpyen Dap ni KIA Masat (15) hte (21) hpyen man ginra de 120mm (34) lang jahte tam gap bun ai lam na chye lu ai.
