Gumshem Myen hpyen dap kawn lai wa lai sa mungshawa ni hpe sinat hte hkan gap
Gumshem Myen hpyen dap ni kawn Myitkyina Masat (5) lahta tsang jawng makau na Myen Balik Dap makau hku Cycle jawn lai wa ai mungshawa (2) hpe sinat hte (2) lang hkan gap ai raitim, mungshawa (2) hprawng lawt ai hpe mu lu ai lam, ginra masha langai shana wa ai kaw na chye lu ai.
“Masat (5) lahta tsang jawng makau na Myen Balik Dap makau kaw lam daw mi tup shanhte pat da ai. September 12 ya shana de hkying 8:30pm aten daram hta, makau hku mungshawa (2) Cycle hte lai wa ai hpe sinat hte hkan gap ai lam mu lu ai, hkan gap hkrum ai mungshawa ni hprawng lawt mat ai” nga nna dai ginra na salang langai tsun dan ai.
Lai wa sai ten hta gaw shanhte Myen Balik Dap makau na lam hpe shana hkying 8:00pm kaw she pat ai raitim, lai wa sai shata mi kaw nna gaw shana hkying 7:00pm aten kaw nna jahpawt 6:00am aten du hkra pat ai, lai wa lai sa mungshawa ni hpe shani tup sinat shachyen nna azi sin yu taw ai lam, salang wa matut tsun ai.
NUG kawn D-Day n dau ngut ai hpang kaw nna Myitkyina Muklum kata shana hkying 7:30pm daram nga hte mungshawa ni kadai shinggan nau n pru gwi sai sha n-ga, Myitkyina Muklum kata na ramma ni hpe Gumshem Myen hpyen dap kawn aten ntam lam hkan rim hkawm ai masa nga taw re majaw, sadi sahka let nga ra ai lam chye lu ai.
Ya aten Myitkyina Muklum kata hta, Ka-ni hpraw dut sha ai masha grau law wa ai rai nna, ndai September shata laman hta sha မူးယစ် Balik ni kawn rai law law hte lu rim ai masha marai 3 jan nga sai hte shara shagu Ka-ni htu ai masha ni grai law wa ai majaw, kashun kashe manghkang grau sawng wa ai hpe mu mada lu ai lam, Myitkyina ginra masha ni tsun shana wa ai kaw na chye lu ai.
