Gumshem Myen hpyen dap kawn laknak hkrup mara gap
Waimaw Gumshem Myen hpyen dap, Hk.L.Y (58) dap kawn August shata 8 ya shana hkying 8:00pm aten kaw nna jahpawt hkying 4:00am aten du hkra makau grup yin de sinat hkrup mara gap bun ai majaw, dai hpyen dap makau hkan na mungshawa dum nta nkau hten za hkrum ai lam, buga masha ni kaw na chye lu ai.
Lai wa sai August shata praw 3 ya shana hta mung, Hk.L.Y (58) kaw nna grup yin de sinat hkrup mara gap ai majaw, mungmare masha ni hkrit tsang nna shana aten gan koi yen hkawm ra ai sha n-ga, mare kata kaw sinat kaba si hkrat kapaw ai majaw, Labang mare na mungshawa dum nta (6) hten za hkrum ai hte U, Wa 10 jan daram si sum mat ai lam, dai ginra na salang langai tsun ai.
Waimaw Shwi Nyawng Pyin Hk.M.Y (321) dap kawn mung August 8 ya jahpawt 3:30am aten N-jun Bum maga de laknak kaba 105mm gap bun ai rai nna, jahpawt hkying 6:40am aten hta Jam Bu Bum Gumshem Myen hpyen dap, Hk.L.Y (238) dap kawn KIA Masat (14) Dap Dung ginra de 81mm gap bun ai lam, shawng lam na lit nga ai salang ni kaw na chye lu ai.
August shata 8 ya jahpawt hkying 7:00am aten hta gaw, KIA Masat (9) Dap Ba, Masat (44) Dap Dung ginra, Nam Tin lahta Mile-7 mayan hta shamu shamawt hkawm nga ai Hk.M.Y (116) dap hte Hk.L.Y (42) pawng hpawm hpyen hpung ni Lunghkang maga de lung wa ai kaw KIA hpyen hpung ni hte Mile-5 mayan hta ang katut gasat poi byin ai lam chye lu ai.
