Gumshem Myen hpyen dap kawn malu masha htaw shalai ai lam hkum pat tawn ai majaw hpyen yen ni malu masha yak hkak nga

Hpyen majan a majaw hpyen koi yen hkrum nga ai Mungmyit Sinli, Munggu Ginwang, Hpawng Seng hkran de na hpyen yen mungshawa ni hta ya aten malu masha ra kadawn nga ai raitim, Gumshem Myen hpyen dap kawn malu masha htaw shalai ai lam hkum pat tawn ai majaw, malu masha hkyak hkyak ra kadawn nga ai lam na chye lu ai.

Ndai hpyen yen ni gaw, Man Yang hte Bang Mwi mare kaw na htinggaw 43, mungshawa marai 173 rai nna, ya aten jarit mayan hta Muka plastic ginsum galaw nhtawm hpyen koi yen shanu shingbyi nga ai lam, dai ginra na salang langai tsun ai.

“Hpyen majan a majaw August shata 3 ya shani kaw nna Miwa Mung jarit mayan de kalang bai hpyen koi yen wa ai, ya aten du hkra malu masha garum ningtum nlu ai, Gumshem Myen hpyen dap kawn mung, Munggu hkran de na malu masha htaw shalai ai lam hpe hkum pat tawn ai re” nga nna tsun ai.

Ya aten hta hpyen majan a majaw Bang Sai, Hpai Kawng makau hkan na mungshawa htinggaw 30 jan daram mung, jarit mayan de hpyen koi yen hkrum nga ai lam na chye lu ai.

Photo Credit; Jade