Gumshem Myen Hpyen Dap kawn shana yup tung aten hpyen nbungli ni hte bawm wa jahkrat
KIA Masat (3) Dap Ba, Masat (1) Dap Dung ginra, Man Je mare makau gasat gala majan byin ai Madang Yang, Hpri Hta Bum makau grup yin de May shata 15 ya shana hkying 12:20pm aten laman, Gumshem Myen Hpyen Dap kawn Jet Fighter nbungli (5) hte bawm wa jahkrat ai re lam, ginra masha ni tsun shana wa ai kaw na chye lu ai.
“Mana na hpyen nbungli ni gaw Manmaw maga kawn langai hpang langai matut manoi lung wa nna bawm wa jahkrat kau da ai, shana yup tung aten nbungli hte bawm wa jahkrat ai majaw, mungshawa masha ni grai hkrit tsang nga ma ai re” nga nna dai ginra na salang langai tsun ai.
May shata 16 ya jahpawt hkying 7:00am-9:00am aten laman hta mung, Madang Yang makau grup yin kaw numdaw (2) lang gasat gala majan byin ai lam, dai shara makau grup yin hta gaw, lahkawng maga dingyang maja hkrat ai masa re lam, salang wa matut tsun ai.
May shata 15 ya jahpawt hkying 5:40am aten laman hta mung, Madang Yang makau grup yin kaw minutes (20) daram gasat gala majan byin ai rai nna, shana maga kaw nna ya aten du hkra Nawng Jang Kawng, Hpunggyi Jawng wang kaw hpyen hpyen hpung ni shara wa la nga ai majaw mungshawa ni hkrit tsang nga ma ai.
Masat (1) Dap Dung ginra, Man Je Hk.M.Y (319) dap kawn gasat gala majan byin ai Madang Yang grup yin de May shata 15 ya shani 120mm (6) lang gap bun ai lam nga ai.
May shata 15 ya shani hkying 2:10pm aten laman hta KIA Masat (4) Dap Ba, Masat (8) Dap Dung ginra, Nam Ba Chi kaw KIA Masat (39) Dap Dung hpyen hpung ni hte Gumshem Myen hpyen hpung ni gasat gala majan byin ai.
May shata 15 ya shana maga hkying 5:30pm aten hta mung, KIA Masat (10) Dap Ba, Masat (17) Dap Dung ginra, Nawng Hkyu hte Kawng Hkam lapran kaw Dapnu (99) kata na Gumshem Myen hpyen hpung ni hte MNDAA hpyen hpung ni gasat gala majan byin ai lam na chye lu ai.
