Gumshem Myen hpyen dap kawn Wa Ra Zup mare de sinat laknak hkrup mara gap bun
KIA Masat (2) Dap Ba ginra, Danai Lido lam mayan, Wa Ra Zup mare de Gumshem Myen hpyen dap kawn October praw (7) ya shani hkying 10:30am aten daram hta sinat laknak hkrup mara gap bun ai lam, ginra masha ni kaw na chye lu ai.
“Danai maga kawn hpyen shamu shamawt yu wa ai Gumshem Myen hpyen dap ni hpe KIA hpyen hpung ni hkap gap gasat ai hta, Gumshem Myen hpyen dap kawn mare de sinat kaba gap bang ai lam nga ai, mungshawa hkra hkala ai lam gaw nnga ai” nga nna dai ginra na lit nga ai salang langai tsun ai.
Sinat kaji kaba gaw grai ngoi ai, sinat lanak si mare makau hkan gaw hkrat ai rai nna, mungshawa nkau hkrit tsang ai majaw, nawku jawng hkan gan koi yen shingbyi nga ma ai lam, salang wa matut tsun ai.
Dai ni Yuzana company lam mahkrai kaw mung, bawm ngoi wa ai ten mungshawa langai gat pru wa ai shaloi lata kaw gap hkra hkala la ai lam nga ai re hpe ginra masha ni kaw na matut chye lu ai.
Ya aten KIA Masat (2) Dap Ba ginra, Danai Lido lam mayan de Gumshem Myen hpyen dap ni kawn hpyen shamu shamawt ai lam dingyang galaw nga ai majaw, KIA hpyen hpung ni hte shani shagu ngu na gasat poi ni byin nga ai lam chye lu ai.
