Gumshem Myen hpyen dap langai shanhte dap jung shara jahkrat ai kaw na koi yen mat
KIA Masat (1) Dap Ba, Masat (7) Dap Dung ginra, Putao Ginwang, Nhka Ga kaw dap jung shara jahkrat nga ai, gumshem Myen hpyen dap langai December shata (19) ya jahpawt dai shara kaw na hting nut koi yen mat wa sai lam chye lu ai.
KIA hpyen hpung ni htim gasat na matu, Nhka Ga ginra de hpyen shamu shamawt lung wa ai lam hpe dai shara kaw dap jung nga ai gumshem Myen hpyen dap ni chye mat ai majaw, ngam ai malu masha n-gu, jum zawn re ni hpe dut jaw kau da nna, shara kaga de hting nut koi yen mat wa sai lam, shawng lam shi sawk langai tsun ai.
Hting nut koi yen kau da sai dai gumshem Myen hpyen dap hpe KIA ni wan nat jahten nna, zing madu kau sai hte dai Myen hpyen dap gaw shaning na na Nhka Ga kaw dap jung shara jahkrat nga ai hpyen dap langai re lam chye lu ai.
Nhka Ga mare gaw KIA hte gumshem Myen hpyen dap ni gasat gala majan byin ai a majaw, 2013 ning kaw na htinggaw 30 daram hpyen koi yen let, wa shingbyi nga ai mare re hpe chye lu ai.
Ya aten hta KIA ni dap jung shara jahkrat nga ai Dap Ba, Dap Dung ginra ni hta gumshem Myen hpyen dap ni hpyen n-gun htu shadut nga ding yang re ai sha n-ga, KIA ni mung gumshem Myen hpyen dap ni hpe htim gasat zing madu ding yang rai nga ai lam matut chye lu ai.
