Gumshem Myen Hpyen Dap ni gap dat ai laknak si hkra nna mung mare masha marai (6) hkala hkrum

Hpakant, Nam Ya mare kaw dap jung nga ai Gumshem Myen Hpyen Dap, Hk.M.Y (12) dap kawn July shata (15) ya jahpawt 7:30am aten gap dat ai laknak si Senghpra mare kaw wa hkrat nna, mung mare masha marai (6) hkala hkrum ai lam, buga masha ni kaw na chye lu ai.

Laknak si hkra nna hkala hkrum ai ni gaw, Salang Hpaula Dut La, Salang Maji La, Jan. Marip Kaw, Jan. Hpauyu Hkawn Shawng, Shayi Hpala Ma Pri, hte Jan Hpauyu Seng ni rai nna, marai (2) gaw hkala sawng ai hte ya aten gara de mung nmai sa ai majaw, dum n-ta kaw sha tsi tsi gawn lajang nga ai lam, dai ginra na buga masha langai tsun ai.

Gumshem Myen Hpyen Dap ni gaw Nam Ya kawn laknak kaba (5) lang gap dat ai hta, laknak si (3) gaw Senghpra mare kaw wa hkrat ai majaw, mare masha ni hkala hkrum ai sha n-ga, Wa langai mung si sum mat ai lam na chye lu ai.

Gumshem Myen Hpyen Dap ni gaw ya na zawn mungshawa ni nga ai ginra de laknak kaba ni hkrup mara gap ai majaw, mungshawa dum n-ta hkan wa hkrat nna mung mare masha ni hkala nba, asak si sum ai lam ni law law lang byin sai re hpe chye lu ai.