Gumshem Myen hpyen dap ni gap dat ai sinat kaba, hpyen yen dabang kaw wa hkrat kapaw ai majaw mungshawa marai 2 asak si sum

Mungmyit Sinli Ga, Kutkai lawu Galeng mare Zup Awng hpyen yen dabang lawk (3) kaw, June shata 17 ya shani hkying 11:30am aten hta Kutkai kaw dap jung nga ai gunshem Myen hpyen dap ni gap shadam dat ai sinat kaba a majaw, hpyen yen mungshawa marai 2 asak si sum nhtawm, marai 1 hkala hkrum ai lam chye lu ai.

Asak si sum ai yan gaw, Jan. Hpaugun Nang Lai asak (56) ning hte Ma shalet saranum Jumzang Dau Naw asak (28) ning yan rai nna, Salang Dumhpau La Awng asak (75) ning hkala hkrum ai lam chye lu ai.

Asak si sum ai yan hpe June shata 18 ya shani makoi mayang akyu hpyi hpawng galaw na rai nna, hkala hkrum ai salang wa hpe gaw Kutkai shinggyim nauna garum hpung ni Kutkai de woi mat wa sai lam buga masha ni tsun ai.

Zup Awng hpyen yen dabang hta hpyen koi yen nga ai mung shawa yawng 1300 jan nga ai rai nna, dai dabang hta 9 ning daram shingbyi nga sai re lam chye lu ai.