Gumshem Myen hpyen dap ni gap dat ai sinat kaba si hkra nna Hpawng Seng mare na mungshawa langai hkala hkrum
Mungmyit Sinli Ga, (Kachin Sub-state) ginra hta, October shata 16 ya shana maga hkying 3:30pm aten hta, Gumshem Myen hpyen dap ni gap dat ai sinat kaba si (2) Hpawng Seng mare na, mare salang a dum n-ta kaw wa hkrat nna, salang Mwihpu La Htoi hkra hkala hkrum ai lam chye lu ai.
Hpawng Seng mare salang Mwihpu La Htoi gaw, sinat kaba si hkra nna kan hkan, lata hkan hkra hkala la ai sha n-ga, dum n-ta ni mung hten za hkrum ai lam, hkala hkrum ai salang wa hpe Gumshem Myen hpyen ni kawn October (17) ya jahpawt pala hkyep wa ga shaw ya ai re lam, dai ginra na salang langai tsun ai.
Gumshem Myen hpyen dap ni kawn Munggu Hpawng Seng ginra de sinat laknak kaba nhkring nsa gap bun nga ai rai nna, Kokang MNDAA ni hte mung shani shagu ngu na gasat gala majan byin nga ai re lam chye lu ai.
October shata (16) ya shani hta mung, hkying 11:30am aten daram hta KIA Masat (6) Dap Ba ginra, Dima, Man Kang Bum grup yin de Tatma (99) kata na Gumshem Myen hpyen n-gun (150) jan htu shadut lung wa ai majaw, KIA hte Gumshem Myen hpyen hpung ni gasat gala majan byin ai lam na chye lu ai.
