Gumshem Myen hpyen dap ni Ginjaw Ginra Nam San Yang hpyen man de laknak kaba matut manoi gap bun nga

Ginjaw Ginra Nam San Yang hpyen man maga de gumshem Myen hpyen dap ni September shata 29 ya jahpawt hkying 5:50am aten kaw nna, shana de hkying 4:44pm laman du hkra, laknak kaba matut manoi gap bun nga ai lam chye lu ai.

Hka Ya, Bumre, Hpun Pen Bum, Lai Lum hte Awng Ja kaw dap jung nga ai gumshem Myen hpyen dap kaw na, laknak kaba matut manoi gap bun nga ai lam lit nga ai salang ni kaw na chye lu ai.

Gumshem Myen hpyen dap ni laknak kaba matut manoi gap bun nga ai hta KIA hpyen hpung maga kaw na mung laknak kaba bai nhtang gap bun ai lam chye lu ai.

Ya aten KIA Ginjaw Ginra hta gumshem Myen hpyen dap kaw nna, hpyen shamu shamawt nga ai hte laknak kaba ni matut manoi gap bun nga nhtawm, gasat gala majan matut byin nga ai re.

KIA Dap Ba, Dap Dung shara shagu ngu na daram hta gumshem Myen hpyen dap kaw nna, hpyen shamu shamawt nga ai hte gasat gala majan ni mung matut manoi byin wa mai ai lam chye lu ai.