Gumshem Myen hpyen dap ni Helicopte nbungli hte bawm wa gap ai majaw, mungshawa marai 1 si, marai 2 hkala hkrum
Mungmyit Sinli Ga (Kachin Sub-State) KIA Masat (6) Dap Ba, Masat (9) Dap Dung ginra, Nam Um mare Sai Hkau daw kaw, July shata 25 ya shani hkying 11:00am aten daram hta gumshem Myen hpyen dap ni Helicopter nbungli 1 hte bawm wa jahkrat, jak sinat hte wa gap gasat ai majaw, mungshawa marai 1 si, marai 2 hkala hkrum ai lam, ginra masha ni tsun ai kaw na chye lu ai.
Gumshem Myen hpyen dap ni laknak kaba hkrup mara gap shadam bun ai sha n-ga Helicopter nbungli hte mung, bawm wa jahkrat bun ai hta Nam Um mare Sai Hkau daw na Balawng mungshawa nta 2 kaw bawm wa hkrat ai majaw, mungshawa ni si hkala hkrum ai lam chye lu ai.
July shata 24 ya shana hkying 11:00pm aten daram kaw nna, July shata 25 ya jahpawt hkying 4:00am aten daram du hkra, Muse (105) mile, Mungbaw hka mahkrai, Kawngra Bum hte Nampaka kaw dap jung nga ai gumshem Myen hpyen dap Hk.L.Y (123) dap ni, Kawng Wing mare hte Nam Um mare maga de laknak kaba gap shadam ai lam nga ai.
Ndai zawn gumshem Myen hpyen dap ni laknak kaba hkrup mara gap shadam ai majaw, Nam Um mare gat pa kaw sinat kaba si langai wa hkrat kapaw ai hta gat ginsum ni hten mat ai raitim, masha hta hkra hkala ai lam nnga ai hpe chye lu ai.
Kawng Wing mare maga de sinat kaji kaba ngoi ai nsen ni na lu ai, Myen hpyen ni nga ai shara kaw, TNLA ni sa gap kajam dat ai hpang gumshem Myen hpyen ni shara shagu de na laknak kaba hte gap bun wa ai re lam, ginra masha ni tsun ai.
July shata 23 ya shana maga hkying 5:00pm aten daram hta mung, Muse Myo Ma Pyi Tu Tsit hpyen hpung ni gaw, TNLA ni nga ai Muse Namhkam, Jelan modo lam hku lai wa ai ten TNLA ni hkap jahkring yang njahkring ya majaw, TNLA ni hkan gap ai hpang gasat poi byin ai re.
Dai gasat poi byin ai hta Myo Ma P.T.Ts maga na marai 2 si sum mat ai lam chye lu ai. Dai hpang gumshem Myen hpyen dap ni laknak kaba hte hkrup mara bai gap shadam ai lam na chye lu ai.
