Gumshem Myen hpyen dap ni hte KIA ni gasat gala majan byin
Mungmyit Sinli Ga (Kachin Substate), KIA Masat (4) Dap Ba, Masat 8 Dap Dung ginra, Bumsum Shi bum pawt Namba Chyi hte Pa Ju mare lapran kaw, January shata 25 ya jahpawt hkying 10:20am aten hta gumshem Myen hpyen dap hte KIA Masat (39) Dap Nawng Dap Dung ni gasat gala majan byin ai lam chye lu ai.
“Gumshem Myen hpyen dap gaw, Ts.K.Hk (16) kata na Hk.L.Y (241, 242) dap na hpyen n gun (40) daram, Man Nawng mare modo lam kaba hku shimlam la ya na matu yu wa ai kaw gasat poi byin ai re” nga nna shawng lam na lit nga ai salang langai tsun dan ai.
Gasat gala majan hta gumshem Myen hpyen maga si hkala ai lam nga ai hte Kutkai kaw dung ai gumshem Myen hpyen amyawk dap ni kaw nna mung, gasat poi byin ai maga de laknak kaba (3) lang gap bun ai lam chye lu ai.
Gasat poi byin ai makau grup yin shara ni hta gumshem Myen hpyen ni n gun 200 daram bai matut jahkrat da ai lam, ginra shi sawk ni kaw na matut chye lu ai.
KIA Masat (5) Dap Ba, Masat (3) Dap Dung ginra hta mung, Sadung maga na yu wa ai gumshem Myen hpyen n gun (50) daram re ai hpyen hpung ni hte KIA ni, January shata 24 ya jahpawt hkying 7:30am aten hta Sadung hka rum hte Sadung pa lapran kaw gasat poi byin ai lam nga ai re.
Shana maga hkying 2:20pm aten hta gumshem Myen hpyen ni hpe KIA hpyen hpung ni numdaw kalang bai hkap gap gasat ai hta tai hpyen maga marai (2) hkala hkrum nna, Machyang Bum, Bum Tawng mare kawn mile (19) maga de matut lai yu wa sai lam chye lu ai.
