Gumshem Myen hpyen dap ni hte KIA ni gasat gala majan matut byin
KIA Masat (8) Dap Ba, Masat (5) Dap Dung ginra hta shamu shamawt hkawm ai gumshem Myen hpyen dap Hk.M.Y (415) hte Hk.L.Y (10) dap na pawng hpawm hpyen n gun (80) daram hpung ni hpe, August shata praw 10 ya jahpawt hkying 4:30am aten hta Kyauk Talung mare makau kaw KIA ni bawm hte hkap gap gasat ai lam chye lu ai.
Dai hkap gap gasat ai hta Hk.M.Y (415) dap na Major. Ting Myint Aung, Gyi Jum Ko Myo, Tsi sara hte hpyen ma langai si nna, marai (4) hkala sawng ai lam, shawnglam shisawk ni kaw na chye lu ai.
August shata 11 ya shani hta mung, Masat (8) Dap Ba ginra, Sin Gung Tai kawn Mye Nu maga de shamu shamawt shang wa ai, Hk.L.Y (77) dap na hpyen hpung hte KIA ni Mye Nu kaw gasat poi byin ai re.
KIA Masat (3) Dap Ba, Masat (12) Dap Dung ginra, Hti Chyaik maga na hka sanghpaw li kaba 3 hte kaji 2 hta hpyen lang arung arai machyu pala htaw nna lung wa ai gumshem Myen hpyen ni hpe, August shata 11 ya shana maga hkying 2:10pm aten hta Katha hte Nyawng Chyi Htauk lapran kaw KIA ni sinat kaba hte hkap gap gasat ai hta Pung Nya sanghpaw li langai kaw hkra kapaw mat ai lam chye lu ai.
August shata 11 ya shani hta sha, Mungmyit Sinli Ga (Kachin Sub-state), KIA Masat 4 Dap Ba, Masat 8 Dap Dung ginra, Namhpakka hpyen dap Hk.L.Y (123) dap na, leng 12 modo 2 hte pru wa ai, gumshem Myen hpyen dap dapnu 99 kata na hpyen n gun 100 daram hpung ni gaw, Hangkai Nammwi mahkrai kaw wa shatup nna, KIA ni nga ai maga de shamu shamawt pru wa ai hpe Hangkai hte Hku Mung lapran kaw KIA ni sa htim gap ai kawn gasat gala byin ai lam chye lu ai.
