Gumshem Myen hpyen dap ni hte KIA ni gasat gala majan matut byin
KIA Masat (5) Dap Ba, Masat (3) Dap Dung ginra, Lagat Kawng hte Htingraw Kawng maga de shamu shamawt htu lung wa ai, gumshem Myen hpyen dap hte KIA hpyen hpung ni, July shata praw 4 ya jahpawt hkying 7:10am aten daram kaw nna, gasat gala majan matut byin ai lam chye lu ai.
Ndai KIA Masat (3) Dap Dung ginra de, June shata 22 ya shani kaw nna gumshem Myen hpyen dap hte Shwe Min woi awn ai Pyi Tu Tsit pawng hpawm hpyen hpung ni htu shadut htim gasat lung wa ai sha n-ga Jet nbung li hte mung bawm wa jahkrat, gap gasat ai lam ni galaw nga ai re.
Dai ni July shata praw 4 ya shana daw hkying 1:00pm aten daram hta mung, Dawhpum Yang maga na lung wa ai gumshem Myen hpyen modo hpung ni hpe KIA hpyen hpung ni, Hka La Kadawng kaw, hkap shingla gasat dat ai raitim, dai hpyen hpung ni gaw, lagaw lam hte Hka Ya maga matut lai lung wa ai lam, ginra shisawk ni kaw na chye lu ai.
KIA Masat (18) Dap Dung ginra, Nam San Yang mare makau hta mung, dai jahpawt hkying 9:00am aten daram kaw nna, gumshem Myen hpyen dap ni sinat kaba kaji hte KIA ni nga maga de gap bun ai majaw, KIA ni mung bai nhtang gap bun ai lam na chye lu ai.
Ya aten, Nam San Yang grup-yin shara ni hta hpyen masa shaja hkat nga ai re majaw, Manmaw, Myitkyina modo lam mayan pru hkawm ai hpe mai byin ai made sadi koi yen nna, gasat gala majan byin chye ai shara de n pru hkawm hkra sadi koi yen na hte n-sun n-ang ai tai hpyen a matsing masa hta masha arung arai hku nna, shang achya lawm ai lam n nga hkra koi yen shajang na lam hpe Laiza Ginwang, Mungchying Uphkang Dap kaw nna sadi jaw ndau laika shapraw da ai kaw na chye lu ai.
၎
င
၎
၎
