Gumshem Myen hpyen dap ni hte KIA, pawng hpawm hpyen hpung ni laknak kaba hte gap gasat hkat
Manmaw, Myitkyina modo lam, Mali Yang gumshem Myen Balik Dap ni nga ai maga de, September shata 18 ya shani KIA, pawng hpawm hpyen hpung ni laknak kaba gap bun ai lam chye lu ai.
Dai hpang gumshem Myen hpyen ni mung, KIA, pawng hpawm hpyen hpung ni nga ai maga de, sinat kaba 2 lang hte sinat kaji hpan hkum bai nhtang gap bun ai lam nga ai.
Shana daw hkying 3:30pm aten daram hta Kagam Bum kaw nga ai gumshem Myen hpyen dap ni, Ja Pu hpyen man maga de, laknak kaba matut gap bun ai lam chye lu ai.
Ginjaw ginra, Nam San Yang hpyen man, Lai Lum Awng Ja gumshem Myen hpyen dap hpe mung, September shata 17 ya shani hta KIA pawng hpawm hpyen hpung ni laknak hte gap bun ai lam, shawnglam shisawk ni kaw na chye lu ai.
Ya aten gumshem Myen hpyen dap ni, hka lam hkarang lam hku hpyen shamu shamawt lam ding yang ngu na galaw nga ai majaw, gasat gala majan gaw matut nna laja wa na masa nga ai lam, shawng lam na lit nga ai salang ni tsun ai kaw na chye lu ai.
