Gumshem Myen hpyen dap ni htu shadut lung wa ai majaw, gasat gala majan byin

Gumshem Myen hpyen ni htu shadut lung wa ai majaw, KIA pawng hpawm hpyen hpung ni hte gasat gala majan byin ai lam chye lu ai.

KIA hpawng hpawm hpyen hpung ni shara la nga ai, Waimaw Lamyang hpyen man maga de, gumshem Myen hpyen hpung ni laknak kaba hte shawng gap bun, lagaw lam hku mung htu shadut lung wa ai majaw, April shata praw 3 ya jahpawt hkying 7:00am aten daram kaw nna gasat gala majan byin ai re.

Lawu Indaw maga de mung, April shata praw 3 ya jahpawt hkying 6:30am aten daram kaw nna, gumshem Myen hpyen ni nbungli hte KIA ni nga ai maga de bawm si shi kahtawp jahkrat bun ai lam, shawng lam na lit nga ai salang ni tsun ai.

Danai Ledo lam Wara Zup mare kaw dap jung shara la nga ai, gumshem Myen hpyen dap npu na, Myint Ze Than (Pyi Tu Tsit) hpyen hpung ni hte KIA pawng hpawm hpyen hpung ni, April shata 3 ya shana maga hkying 3:00pm aten kaw nna gasat poi byin nga ai re.

Gasat poi byin ai hpang shana maga hkying 6:00pm aten daram hta Pyi Tu Tsit hpyen hpung ni, Wara Zup mare na mungshawa nta htinggaw 6 hpe mung wan nat jahten kau ya ai lam, ginra shiga lawk kaw na chye lu ai.

Mamaw hpyen man maga de mung, shani shagu nbungli drone ni hte gap gasat nga ding yang re lam, shawng lam na lit nga ai salang ni kaw na chye lu ai.