Gumshem Myen hpyen dap ni, Ja Hta mare kaw drone bawm gap gasat
Gumshem Myen hpyen dap ni, December shata 18 ya shana hkying 8:00pm aten daram hta Ja Hta Mare kaw suicide drone hte wa gap gasat ai lam, ginra masha ni kaw na chye lu ai.
Mana Ja Hta Mare kaw Myen hpyen ni a, suicide drone langai wa hkrat kapaw ai lam nga ai, masha hkra hkala ai lam nnga ai, nta gaw hkru hten mat ai lam, lit nga ai salang ni tsun ai kaw na chye lu ai.
December shata 15 ya shani hta mung, Waimaw hpyen man Nawng Si Paw Mare de, Myitkyina kaw na rawt wa ai Jet nbungli, (M.P.Hk) gumshem Myen hpyen dap hte Waimaw kaw dap jung nga ai Hk.L.Y (58) dap ni laknak kaba hte hkrup mara gap shadam, nbungli bawm jahkrat bun ai majaw, Nawng Si Paw Mare hkristan nawku hpung wang kaw wa hkrat kapaw ai lam nga ai.
Nbungli bawm, laknak kaba si wa hkrat kapaw ai hta nawku htingnu, gawknu hte hpung magam gun ni nga ai dum nta yawng hten za mat ai rai nna, nawku htungnu gaw dingshawn pyi nshang shi ai re lam, ginra masha ni tsun ai kaw na chye lu ai.
Manmaw hpyen man shara de mung shani shagu ngu na KIA pawng hpawm hpyen hpung ni hte gumshem Myen hpyen ni gasat gala majan byin nga ai rai nna, December shata 19 ya shani hta Manmaw Kung Mahet Mare hpe gumshem Myen hpyen ni mungshawa nta wan nat jahten ya nga ai lam, shawng lam na lit nga ai salang ni kaw na chye lu ai.
