Gumshem Myen hpyen dap ni Jet nbungli hte bawm wa jahkrat

KIA Masat (9) Dap Ba, Masat (26) Dap Dung ginra, Sezin mayan kaw July shata 19 ya jahpawt hkying 5:00am aten daram hta gumshem Myen hpyen dap ni Jet nbungli hte bawm wa jahkrat bun ai lam chye lu ai.

Hkying 1:00pm aten daram hta Sezin kaw gumshem Myen hpyen dap ni, Helicopter nbungli langai hte hpyen n gun, machyu pala ni wa jahkrat ai hpang July shata 17, 18 ya shani gasat gala majan byin ai makau grup yin shara ni de, Jet nbungli hte bai wa gap bun kau da ai lam chye lu ai.

KIA Masat (5) Dap Ba, Masat (3) Dap Dung ginra, Nang Zaw Yang KIA ni nga ai ngu shadu ai makau grup yin shara ni de, July shata 19 ya shana daw hta gumshem Myen hpyen dap Hk.L.Y (58) dap ni, 120mm ngu maram ai laknak kaba hte gap bun ai lam, ginra masha ni kaw na chye lu ai.

Gumshem Myen hpyen dap hte Pyi Tu Tsit pawng hpawm hpyen hpung ni ndai July shata kaw nna, KIA ni dap jung shara jahkrat nga ai shara de, ma ja hpyen shamu shamawt tawt lai shang wa ai majaw, shani shagu ngu na gasat gala majan matut manoi byin nga ai hta gumshem Myen hpyen dap ni gaw, majan gasat nbungli Helicopter hte Jetfighter ni jai lang nhtawm, bawm jahkrat bun, gap gasat ai lam ni galaw nga ai re.