Gumshem Myen hpyen dap ni kawn mare kaw nnga na matu, gawt shachyut ai majaw, mungshawa nta htinggaw 2,000 daram hprawng yen
Hpakant ginra hta shamu shamawt chyinglau hkawm ai gumshem Myen hpyen dap ni gaw, mungshawa ni hpe mare kata nnga na matu gawt shachyut ai majaw, mungshawa nta htinggaw hkying 2,000 daram gaw nawku jawng hpunggyi jawng ni hkan hprawng machyu nga ai lam, buga masha ni kawn chye lu ai.
Dai ni November shata 24 ya shani hta mung gumshem Myen hpyen dap ni, Seng Tawng Kawng San, Bum Nan mare hkan na mungshawa ni hpe gawt shachyut ai majaw, KBC nawku jawng wang, RCM nawku jawng wang hte Hpunggyi jawng wang ni hkan hprawng machyu shingbyi nga ai lam, Hpakant ginra masha ni tsun ai kaw na chye lu ai.
November shata 23 ya shani Seng Tawng Kawng San mare makau kaw KIA ni bawm hte hkap hkap gasat dat ai hpang, gumshem Myen hpyen dap ni sinat hkrup mara gap dumbre bun ai majaw, mungshawa langai asak sum mat ai lam mung nga ai re.
Ya aten Hpakant ginra hta KIA hte gumshem Myen hpyen dap ni hpyen masa shaja hkat nga ai aten re majaw, mungshawa ni hkawmsa hkawmwa lam hta sadi maja let hkawmsa na lam, Hpakant ginra masha ni tsun sadi jaw hkat ai kaw na chye lu ai.
November shata 24 ya shani hkying 11:55am aten hta Kamaing gumshem Myen hpyen dap, byuha kawng kaw na gap dat ai laknak kaba 81mm ngu maram ai pala si langai gumshem Myen hpyen, Kamaing uphkang rung shawng kaw wa hkrat kapaw ai majaw, rung jare langai si nna, marai 4 hkala hkrum ai lam, Kamaing mare masha ni kaw na chye lu ai.
Kamai mare kata hkan mung, gumshem Myen hpyen dap hte Pyi Tu Tsit pawng hpyen hpung ni kaw nna, shanhte ntsen nhten re mungshawa ni a dum nta hkan sawk jep ai lam, lai wa lai sa mungshawa ni hpe jep shatsang ai lam ni jahkring hkring galaw ai hpe mung matut chye lu ai.
