Gumshem Myen hpyen dap ni laknak kaba gap bun ai majaw, mungshawa marai (6) asak si sum nna marai (11) hkala hkrum
Gumshem Myen hpyen dap ni gap bun ai laknak kaba a majaw, mungshawa marai (6) asak si sum nna, marai (11) hkala hkrum ai lam chye lu ai.
May shata 20 ya shani ka-ang aten, M.P.Hk gumshem Myen hpyen dap kaw nna, gap dat ai laknak kaba si, Waimaw ginra Hkat Cho kaw wa hkrat kapaw ai majaw, mungshawa marai (6) asak si sum nna, marai (11) hkala sawng ai lam, ginra masha ni kaw na chye lu ai.
Laknak kaba si hkrat kapaw ai shara gaw, Slg. Mawng Ley hte Slg. Kyaw Oo yan a nta kaw hkrat kapaw ai majaw, dum nta masha ni marai (6) asak si sum mat nna, ngam nga ai marai (11) hkala sawng ai lam chye lu ai.
Ya aten Waimaw ginra ni hta gumshem Myen hpyen dap ni nbungli bawm, laknak kaba ni hte hkrup mara gap shadam bun nga ai majaw, dai ginra hkan na mungshawa nkau asak si sum nga ai sha n-ga, dum nta ni mung htenza hkrum nga ai hte hkrit maja, hpyen koi yen nga ra ai lam chye lu ai.
Matut nna Waimaw hte Laiza lam kaba ntsa, KIA hte gumshem Myen hpyen dap lapran hpyen masa shaja hkat nga ding yang rai nna, gasat gala majan mung matut byin nga ai re.
