Gumshem Myen hpyen dap ni laknak kaba hkrup mara gap bun
KIA Masat (3) Dap Ba, Masat (1) Dap Dung ginra hta December shata 13 ya jahpawt hkying 6:45am aten, Man Maw Deng-4 Ht.P.Y dap kaw nga ai gumshem Myen hpyen dap ni kaw nna, Nam Sai mare shinggan bum mayan de laknak kaba 122mm (3) lang gap bun ai lam chye lu ai.
Dai gumshem Myen hpen ni gaw lai wa sai December shata 12 ya shana hkying 11:10pm aten kaw nna, dai shara de laknak kaba gap bun nga ai lam lit nga ai salang ni kaw na chye lu ai.
KIA Masat (5) Dap Ba, Masat (3) Dap Dung ginra hta mung, December shata 13 ya shana daw hkying 2:00pm aten hta Wu Raw bum kaw nga ai bawm lang P.T.Ts ni hku nna, Mang Shang hte Lu Gyi mare lapran grup yin hta 60mm (3) lang gap shadam bun ai lam chye lu ai.
Matut nna KIA Masat (3) Dap Ba, Masat (15) Dap Dung ginra hta mung, December shata 12 ya shani Nmawk Hk.M.Y (437) dap ni kaw nna, Lung Ja Bum lagaw Nam Mawk krung maga de 120mm (3) lang gap bun ai lam chye lu ai.
Ya ten gumshem Myen hpyen dap ni hte KIA ni matut manoi gasat gala majan ni byin nga ai rai nna, gumshem Myen hpyen dap ni kawn KIA ni dap jung shara jahkrat nga ai shara de laknak kaba ni hte hkrup mara gap shadam nga ai lam chye lu ai.
