Gumshem Myen hpyen dap ni, mungshawa ni nga ai shara de, laknak kaba gap bun
KIA Masat (3) Dap Ba ginra, Loi Je ntsa Yaw Yung Bum kaw shara jahkrat nga ai, gumshem Myen hpyen dap ni, November shata praw 6 ya shani hkying 1:00pm aten hta Mai Ja Yang makau mungshawa ni nga ai shara de, laknak kaba gap bun ai lam chye lu ai.
Masha hkra hkala ai lam gaw nnga ai, dai ginra na buga masha ni hte hpyen koi yen mungshawa ni hkrit tsang nga ai lam, buga masha ni tsun ai kaw na chye lu ai.
Mai Ja Yang makau shara ni hta, KIA hte gumshem Myen hpyen dap ni gasat gala majan byin ai lam kaga nnga ai raitim, gumshem Myen hpyen dap ni gaw, mungshawa ni nga ai shara de sinat kaba dasang gap bun ai lam galaw nga ai re.
November shata praw 3 shana hta mung, Mungmyit Sinli Ga (Kachin Sub-state), Kutkai gumshem Myen hpyen myok dap kaw nna, Kutkai Chyum Jawng de laknak kaba 81mm gap bun ai majaw, Chyum Jawng Ma marai 4 hkala hkrum ai lam byin lai wa sai re.
Bai nna, October shata 30 ya jahpawt hkying 1:00am aten daram hta mung, Hkaya Bum kaw dung ai gumshem Myen hpyen dap ni, laknak kaba hkrup mara gap shadam dat ai hta Laiza makau, Munglai Hkyet mare maga de wa hkrat kapaw ai lam byin ai re hpe chye lu ai.
