Gumshem Myen hpyen dap ni nbungli bawm hte laknak kaba hkrup mara gap shadam bun
KIA hte gumshem Myen hpyen dap lapran gasat gala maja laja lana byin nga ai hta gumshem Myen hpyen dap ni kaw nna, nbungli bawm hte laknak kaba ni hkrup mara gap shadam bun nga ai lam chye lu ai.
KIA Ginjaw Ginra hta January shata 29 ya shana hkying 10:27pm aten laman, Bungre kaw dap jung nga ai gumshem Myen hpyen dap ni Lawa Yang maga de 120mm (5) lang gap shadam bun ai lam, lit nga ai salang langai tsun ai.
KIA Masat (3) Dap Ba, Masat (12) Dap Dung ginra, Shwegu Ginwang hta mung, January shata 29 ya shana hkying 8:00pm aten laman, gumshem Myen hpyen dap Jet Fighter langai hte Kun Shawng mare, laika sharin jawng mayan kaw bawm (3) lang wa jahkrat bun ai lam chye lu ai.
Matut nna January shata 29 ya jahpawt hkying 7:00am hte hkying 8:00am aten laman, Maji Gung Kaba gumshem Myen hpyen dap ni Mahtek-Du Hku maga 81mm (8) lang gap bun nna, hkying 8:22am hte hkying 11:30am aten laman, Balawng Dingsa gumshem Myen hpyen dap ni Mawun, Shadan, Kawng Ma Hkyet maga 81mm (10) lang gap shadam bun ai lam matut chye lu ai.
