Gumshem Myen hpyen dap ni nbungli, laknak kaba ni hte hkrup mara gap bun nga
KIA ni dap jung shara jahkrat nga ai Dap Dung ginra shara shagu ngu na daram, Januray shata praw 9 ya shani, gumshem Myen hpyen dap ni nbungli bawm hte laknak kaba hkrup mara gap bun nga ai lam chye lu ai.
KIA Masat (1) Dap Ba, Masat (7) Dap Dung ginra hta January shata praw 9 ya shana daw hkying 3:00pm aten, Myitkyina kaw na rawt lung wa ai gumshem Myen hpyen dap Jet Fighter (1), Hkrang Di Dam kaw bawm kalang wa jahkrat bun nna, Ndang Kawng kaw bawm kalang bai wa jahkrat bun ai lam, lit nga ai salang ni kaw na chye lu ai.
Dai hte maren KIA Masat (3) Dap Ba, Masat (12) Dap Dung ginra hta mung, Tada Oo kaw na lung wa ai Jet Fighter (1), Je U mare hpungkyi jawng kaw January shata praw 9 ya shani hkying 11:00am aten daram hta bawm (2) lang wa jahkrat bun nna, rocket ni wa gap bun ai lam chye lu ai.
Matut nna KIA Masat (9) Dap Ba, Masat (6) Dap Dung ginra hta Le Pyin bawm yam dap kaw nga ai, gumshem Myen hpyen dap Hk.L.Y (79) dap ni, January shata praw 9 ya jahpawt hkying 8:30am aten laman, Hpakant lam, Lung Bra mare shingdu maga de 60mm (1) lang gap bun ai lam nga ai.
Hkying 8:50am aten daram hta mung, Maw Wan lawk myi ga tsi rung kawng kaw nga ai, lak san Masat (30) gumshem Myen balik dap ni, Jam Gap maw maga de 60mm (1) lang gap bun nna, hkying 11:15am aten hta Seng Tawng mare dingsa mayan de (1) lang bai gap bun ai lam chye lu ai.
KIA Ginjaw Ginra Masat (19) Dap Dung hpyen hpung ni nga ai maga de mung, January shata praw 9 ya shana maga hkying 2:21pm aten daram hta gumshem Myen hpyen dap Hk.L.Y (142) dap ni 120mm (4) lang gap bun ai lam matut chye lu ai.
