Gumshem Myen hpyen dap ni rim woi mat ai mungmare masha ni hpe bai dat ya

Hpakant de na yu wa ai gumshem Myen hpyen dap ni rim woi mat wa ai mungmare masha yawng marai (40) hpe, December shata praw 9 ya shani yawng hpe dat ya sai lam na chye lu ai.

Ndai mungmare masha ni hpe, November shata 30 ya shani hte December shata praw 1 ya shani rim woi mat hkrum ai ni rai nna, Peace-talk Creation Group’s (PCG) ni, M.P.Hk de tsun ya ai hpang, dat ya ai re lam ginra masha ni kaw na chye lu ai.

Gumshem Myen hpyen ni rim woi mat hkrum ai mare kahtawng ni gaw, Hkrai Run, Gat Noi, Hkum Tsai Zup, 5 Mile, Seng Hpra, Nam Ya Hkintau, Pahkyem Pa, Nawng San sun hkan na mare masha ni rai nna, dai ni hpe Nam Ya gumshem Myen hpyen dap hta tawn da nhtawm, nkau mi hpe gaw Kamaing Byuha kaw lahkawng ya tawn nna, Hk.M.Y (383) Kayin Myai gumshem Myen hpyen dap kaw woi shadu da ai re.

Gumshem Myen hpyen dap Hk.M.Y (11) hte Hk.L.Y (42) kata na hpyen hpung ni rim woi mat hkrum ai mungmare masha nkau ni hpe gaw, December shata praw 1 ya shani dat ya ai lam nga sai raitim, nkau hpe gaw December shata praw 9 ya shani she yawng ni hpe dat ya ai lam chye lu ai.