Gumshem Myen hpyen dap ni shapyen dat ai suicide drone hte mungshawa marai (2) hkala hkrum
Oplus_131072
Myitkyina maga na gumshem Myen hpyen dap ni shapyen dat ai suicide drone langai, October shata 16 ya shana hkying 11:55pm aten daram hta Laiza Muklum kata kaw wa hkrat kapaw ai majaw, mungshawa marai (2) hkra hkala hkrum ai lam chye lu ai.
“Mana hkying 11:40pm aten daram hta Myitkyina maga na, Npawn mare ntsa hku drone (2) pyen lai wa ai gaw na dat ai, Nam San yang maga de ngoi lai mat wa sai” nga nna Npawn mare na mungshawa langai tsun dan ai re.
Suicide drone bawm langai gaw Laiza Muklum shinggan de hkrat ai, langai gaw Laiza Muklum kata na gat seng ntsa kaw wa hkrat kapaw ai majaw, hpri tsut ni malawng mat ai, gat seng kaw sin yup ai Miwa amyusha yan la hta bawm hkyep hkra hkala ai lam nga ai, gat rai nkau mung hten mat ai lam chye lu ai.
Laiwa sai September shata 21 ya shana maga hkying 3:00pm aten daram hta mung, gumshem Myen hpyen dap a, suicide drone (3) Laiza Muklum makau kaw wa hkrat kapaw ai lam nga sai re.
Ya aten Rawt Malan pawng hpawm hpyen hpung nkau ni hte gumshem Myen hpyen dap ni shani shagu ngu na gasat gala majan byin nga ai hta Myen hpyen dap maga sum machyi ai lam law wa jang, gasat gala majan nbyin ai shara hkan mungshawa ni hpe gap masat tawn nhtawm, nbungli, drone, laknak kaba ni hte hkrup mara gap gasat ai lam chyahkring hkring galaw nga ai majaw, mungshawa masha ni sadi maja let hkawmsa na matu, lit nga ai salang ni tsun sadi jaw da ai hpe mung chye lu ai.
