Gumshem Myen hpyen dap ni shara la nga ai, Gidon Bum hpe KIA pawng hpawm hpyen hpung ni padang zing la lu
KIA Masat (1) Dap Nawng Daju ginra, Gidon Bum kaw shara la nga ai, gumshem Myen hpyen dap hpe, May shata praw 6 ya shani hta KIA pawng hpawm hpyen hpung ni padang dip zingla lu sai lam chye lu ai.
Ndai Gidon Bum gaw, KIA hpyen hpung ni shara la nga ai atena hta gumshem Myen hpyen dap ni shata 4 jan gasat ai hpang, 2016 ning December shata 16 ya shani KIA ni yen da ai shara re.
May shata praw 4 ya shani kaw nna, KIA Masat (1) Dap Nawng Daju kata na gumshem Myen hpyen dap hte Masat (3) Dap Dung ginra kata na gumshem Myen hpyen dap (10) jan hpe masum ya laman padang dip gasat zing la lu ai lam, shawng lam na lit nga ai salang ni kaw na chye lu ai.
Ya majan byin nga Masat (1) Dap Nawng Daju ginra hte Masat (3) Dap Dung ginra ni hta gumshem Myen hpyen dap hte KIA pawng hpawm hpyen hpung ni hpyen masa shaja hkat nga ding yang re sha n-ga, KIA Masat (3) Dap Ba ginra, Nmawk hte Manje maga de mung hpyen masa shaja hkat nga ding yang re hpe mung chye lu ai.
