Gumshem Myen hpyen dap ni, sinat kaba hkrup mara gap shadam ai majaw, nawku jawng makau kaw wa hkrat kapaw
Kamaing mare kaw dung ai, gumshem Myen hpyen dap byuha kawng kaw nna, sinat kaba hkrup mara gap shadam dat ai majaw, February shata 12 ya jahpawt hkying 3:20am aten daram hta Kamaing Kawngra Buga Hkalup Hpung Nawku jawng wang kaw pala si langai wa hkrat kapaw ai lam, buga masha ni kaw na chye lu ai.
Mungshawa masha hta hkra hkala ai lam gaw nnga ai raitim, nta wut shakum ni hkan pala hkyep kamang hkra mat ai lam ni nga ai, ndai aten hta sha, Nam Shem Bum kaw nga gumshem Myen hpyen ni mung, Nam Sheng Mare shingdu maga de sinat kaba hkrup maga gap shadam ai lam chye lu ai.
KIA Masat 8 Dap Ba, Masat 5 Dap Dung ginra hta mung, February shata 12 ya jahpawt hkying 10:00am aten daram hta Budawng mare hte Myalay mare lapran na Mali Hka kaw, Ja htu sha nga ai mungshawa ni hpe gumshem Myen hpyen dap ni sinat kaba hte wa shachyut gap ai lam, buga masha ni kaw na chye lu ai.
Bungli galaw masha ni hpe hkra nhkra gaw atsawm n chye lu shi ai, gumshem Myen hpyen ni gaw, Singhan maga de na pru wa nhtawm, majan byin ai zawn nga hkra wa gap bun ai lam chye lu ai.
