Gumshem Myen hpyen dap ni, Wa Shaga Bum maga de laknak kaba 20 jan lang gap sharu bun
Waimaw kaw dap jung shara jahkrat nga ai, gumshem Myen hpyen Hk.L.Y (58) dap kaw nna, July shata 28 ya shana hkying 8:45pm aten kawn hkying 15pm aten du hkra, Wa Shaga Bum maga de laknak kaba 120mm hte 25 lang gap sharu bun ai lam, shawng lam shiga lawk kaw na chye lu ai.
July shata 28 ya jahpawt manap hkying 2:00am kawn hkying 3:00am aten laman hta KIA Masat (5) Dap Ba, Masat (3) Dap Dung ginra, Wuyan mare kaw dap jung shara la nga ai, Dulay Pyitutsit Dap hpe KIA hpyen hpung sa htim gap gasat ai lam nga ai re.
Ndai gasat poi hta KIA maga na hpyen gyi langai myuhte Mungdan a matu asak apnawng mat wa sai lam, KIA Masat (3) Dap Dung Daju Hpyen Rung kaw nna, yawn hkyen shiga shana da ai kaw na chye lu ai.
Gumshem Myen hpyen Hk.M.Y (384) dap na hpyenla marai (2) si, Pyitutsit hpyenla marai (8) si, Hk.M.Y (103) dap na hpyen du (1) hkala hkrum ai hte machyu pala sinat ni hpe KIA ni zing la lu ai lam chye lu ai.
KIA Masat (9) Dap Ba, Masat (26) Dap Dung ginra hta mung, July shata 28 ya shani Maw Lu Balik Dap kaw na modo (3) hte gumshem Myen hpyenla (80) daram lawm ai hpung ni hpe KIA hpyen hpung ni Tsi Ping hte Hpa Pang lapran kaw bawm hkap adem gasat ai hta modo langai galau dagup mat ai lam na chye lu ai.
