Gumshem Myen hpyen dap, Pyi Tu Tsit hte BGF ni dung ai shara (3) hpe KIA pawng hpawm ni matut padang dip la lu
Chihpwi sa lam kaba ntsa dap jung nga ai, gumshem Myen hpyen dap Hk.M.Y (521) dap, Sanihku Pyi Tu Tsit dap hte jarit sin hpyen BGF dap shara (3) hpe KIA pawng hpawm hpyen hpung ni padang dip zingla lu ai lam chye lu ai.
June shata 13 ya shana maga hkying 5:00pm aten hta Hk.M.Y (521) dap hte Sanihku Pyi Tu Tsit dap hpe zingla lu ai. June shata 14 ya dai hpawt hkying 7:00am aten hta gaw, Shangaw Dumbang mahkrai pawt kaw sin ai, BGF jarit sin hpyen hpung ni a shara hpe padang dip jasan kau lu ai lam, lit nga ai salang ni tsun ai.
Lai wa sai June shata 11 ya shani hta mung, Sadung, Kanpaiti lam kaba ntsa, dap jung nga ai gumshem Myen hpyen dap shara (10) jan hpe KIA pawng hpawm hpyen hpung ni htim gasat padang dip la lu sai re.
June shata 13 ya shani hta sha, Nmawk hte Manje maga Manmaw kaw nna, hpyen garum lung wa ai gumshem Myen hpyen dap a, hpri gang tank modo langai hpe Kawng Ja Yang mare makau kaw, KIA pawng hpawm hpyen hpung ni gap kapaw kau ya ai lam chye lu ai.
