Gumshem Myen hpyen dap shara (2) hpe KIA ni padang dip

KIA Masat (5) Dap Ba, Masat (3) Dap Dung ginra kata dap jung shara la nga ai, gumshem Myen hpyen dap shara (2) hpe KIA ni htim gasat padang dip la lu ai lam chye lu ai.

June shata 11 ya jahpawt daw hkying 9:00am aten daram hta, Chihpwi hte Kanpaiti lam numbraw 13 Kilo pawng hpawm shagyit hte Bum Tawng pawng hpawm shagyit hpe KIA pawng hpawm hpyen hpung ni htim gasat padang dip la lu ai lam, lit nga ai salang ni kaw na chye lu ai.

Gasat gala majan byin nga ai aten, Waimaw kaw na hpyen n-gun garum lung wa ai gumshem Myen hpyen hpung ni hpe KIA pawng hpawm hpyen hpung ni, Wuyan mare makau grup yin hta hkap gap gasat ai lam chye lu ai.

Ya padang dip la lu ai shara lahkawng gaw, shagyit tawn let lai wa lai sa mungshawa ni hpe gumhpraw hta sha nga ai sha n-ga, Chihpwi, Kanpaiti lam kaba ntsa na ahkyak ai shara re hpe mung chye lu ai.