Gumshem Myen Hpyen Dap shara (2) hpe KIA ni sa htim gap gasat
KIA Masat (8) Dap Ba, Masat (35) Dap Dung ginra, Maw Han Mare kaw dap jung shara jahkrat nga ai gumshem Myen Balik Dap hpe, February shata praw 3 ya jahpawt hkying 3:00am aten daram hta KIA hte ginra makawp PDF pawng hpawm hpyen hpung ni sa htim gap gasat ai lam chye lu ai.
Gasat poi hta Balik marai 2 si mat ai rai nna, ngam ai ni gaw laknak jahkrat rim hkam nhtawm, hpyen lang arung arai ni hpe mung zing la lu ai lam, ginra shiga lawk kaw na chye lu ai.
KIA Masat (9) Dap Ba, Masat (6) Dap Dung ginra, Hpakant Namhpyit mare makau Ja Ra Yang kaw dap jung nga ai, gumshem Myen hpyen dap hpe mung, February shata praw 3 ya jahpawt hkying 5:00am aten daram hta KIA hte PDF pawng hpawm hpyen hpung ni sa htim gap gasat ai lam nga ai.
Gasat poi byin ai shara de, Hpakant Byuha Kawng kaw nna laknak kaba hte gap bun ai sha n ga, Jet Fighter nbungli lahkawng hte mung bawm wa jahkrat bun ai lam, buga masha ni kawn chye lu ai.
Hpakant hte Seng Tawng mare kaw mung lai wa lai sa mungmasha ni hpe gumshem Myen hpyen la hte Balik ni, shanhte yu yang ntsen nhten na zawn re ni a cycle modo hkan sawk jep nga ai lam, ginra shisawk ni kaw na chye lu ai.
