Gumshem Myen hpyen dap shara (2) hpe KIA pawng hpawm hpyen hpung ni matut gasat zingla lu

Sinpraw Ginwang Ginjaw, KIA Masat (3) Dap Ba uphkang ginra, Sinlum Byuha gumshem Myen hpyen dap kaba a, makawp rai nga ai, Byeng Wai hte Wa Lai Hpyin Yang hpyen dap shara (2) hpe, March shata 31 ya shani KIA pawng hpawm hpyen hpung ni matut gasat zingla lu ai lam chye lu ai.

Gasat poi laja lana byin nga ai shara de, Nmawk kaw dap jung nga ai Hk.M.Y (437) gumshem Myen hpyen dap kaw nna, laknak kaba hte gap bun ai sha n-ga, Y-8, Y-12, Jet nbungli ni hte nsim nsa bawm jahkrat gap gasat nga ding yang re lam, shawng lam na lit nga salang ni tsun ai.

Sinlum Byuha gumshem Myen hpyen dap kaba hpe mung, KIA pawng hpawm hpyen hpung ni htim gasat nga ding yang re.

Loi Je hte Nmawk modo lam makau grup yin shara ni hta dap jung shara jahkrat nga ai gumshem Myen hpyen dap hpe, March shata 27 ya shani kaw nna, KIA pawng hpawm hpyen hpung ni htim gasat ai 5 ya laman, Myen hpyen dap 10 jan padang dip gasat zingla lu sai re hpe mung chye lu ai.