Gumshem Myen hpyen dap shara 2 hpe KIA pawng hpawm hpyen hpung ni sa htim gasat
KIA Masat (9) Dap Ba ni hte KPDF pawng hpawm hpyen hpung ni, January shata praw 6 ya shani hta gumshem Myen hpyen dap shara 2 hpe sa htim gap gasat ai lam na chye lu ai.
Dai hpawt hkying 4:30am aten daram kaw nna, Gwi Hka kaw dap jung nga ai gumshem Myen hpyen dap hte Nam Ting kaw dap jung nga ai gumshem Myen hpyen dap hpe KIA, KPDF pawng hpyen hpung ni sa htim gasat ai kaw na gasat poi byin ai re lam, ginra shiga lawk kaw na chye lu ai.
Gasat poi byin ai shara de, Hpakant Byuha kawng hte Kamaing Byuha kawng kaw nna, laknak kaba nis gap bun ai sha n-ga, Myitkyina maga na rawt wa ai Jet Fighter nbungli hte mung, bawm wa jahkrat bun ai lam ginra masha ni tsun ai.
Gasat gala majan byin ai makau grup yin mare kahtawng hkan na mungshawa law law mung, tinang shim dum ai shara ni de hprawng koi yen nga ai lam, ginra shiga lawk kaw na chye lu ai.
