Gumshem Myen hpyen hpung ni hkrup mara sinat kaba gap shadam ai majaw, mung shawa ni hkala nba hkrum
Ginjaw Ginra, Masat (5) Dap Ba, Masat (19) Dap Dung ginra, Loi Mawk hte Dung Hung lapran Man Sai Lam she kaw, Gumshem Myen hpyen hpung ni hte KIA hpyen hpung ni gasat gala majan byin ai lam chye lu ai.
July shata praw 2 ya shani hkying 9:35am aten hta Loi Mawk hte Dung Hung lapran Man Sai Lam she kaw, shara la nga ai Gumshem Myen hpyen n-gun (100) daram hpe KIA hpyen hpung ni bawm hkap adem bun ai lam nga ai re.
Dai hpang Gumshem Myen hpyen hpung ni kawn makau grupyin grupgra de sinat kaji hte minutes (10) daram gap shadam ai majaw hkauna galaw nga ai mung shawa marai (5) sinat pala hkra hkala hkrum ai re lam shawng lam shi sawk ni tsun dan ai.
Sinat pala hkra hkala hkrum ai mung shawa ni hta asak (2) ning re ai ma gaw hkala sawng ai re majaw Myitkyina Tsi Rung kaba de shalai nna tsi tsi hkamla nga ai lam, Salang wa matut tsun dan ai.
Masat (3) Dap Dung ginra, Wa Shawng mare shingdu Machyang Bum grupyin de mung, July shata praw 2 ya shani hkying 12:9pm aten hta Hk.L.Y (58) dap kawn sinat laknak kaba (105mm) hte numdaw (3) lang gap bun ai lam nga ai re hpe chye lu ai.
Uru Ginwang Ginjaw, Masat (9) Dap Ba, Masat (44) Dap Dung ginra, Gaw Lu Yang mare baw maga de, hkying 2:50pm aten hta, Nam Ya kaw shara jahkrat nga ai Hk.M.Y (12) kata na hpyen hpung ni kawn sinat laknak kaba (82mm) hte numdaw (18) lang gap shadam ai lam nga ai rai nna, Kum Tsai Zup mare na Hpungtau Jan. Hpukawn Ze Naw a nta wang hta mung wa hkrat kapaw ai re hpe matut chye lu ai.
